1 Kronieken 10
01De Filistijnen wazzen mit Israël in gevecht. t Leger van Israël ging veur heur op loop en n bult Isrelieten sneuvelden in de baargen van Gilboä.
02De Filistijnen zatten Saul en zien zeuns stoef op hakken en ze muiken Saul zien zeuns Jonatan, Abinadab en Malkisua dood.
03Dou kreeg Saul t swoar te verduren. Boogschutters kregen hom onder schot en dou wer Saul zo benaauwd veur heur,
04dat e tegen zien woapenknecht zee: "Krieg dien sweerd en steek mie dood! Ik wil nait lieden, dat dij onbesneden haaidens de gugel mit mie hebben." Dat duurde woapenknecht nait aan: hai waaigerde. Dou kreeg Saul zulm zien sweerd en luit zok der invalen.
05Dou woapenknecht zag dat Saul dood was, luit hai zok ook in zien sweerd valen en sturf.
06Zo kwammen Saul en zien drij zeuns op ain en zulfde dag oet tied en was t ook op ainmoal doan mit zien keunenkshoes.
07Dou de Isrelieten in de vlakte vernammen dat t leger op loop goan was en dat Saul en zien zeuns dood kommen wazzen, luiten zai heur steden in steek en gingen der vandeur. Dou kwammen de Filistijnen en nuzzelden zok doarin.
08Aanderdoags, dou Filistijnen kwammen om versloagen Isrelieten te plundern, vonden ze Saul en zien drij zeuns. Ze laggen in de baargen van Gilboä.
09Zai schudden hom oet, nammen zien kop en zien woapens mit en stuurden dij mit bosschoplopers t haile Filistijnse laand deur om aan de goden en aan t volk t grode nijs te vertellen.
10 Zien woapens werden in n hoes van heur goden opsteld en zien kop wer aan tempel van Dagon vastzet.
11 Dou t volk van Jabes in Gilead vernam wat Filistijnen mit Saul doan haren,
12 gingen ale weerboare manlu op pad en nammen liggoamen van Saul en van zien zeuns mit noar Jabes. Ze begruiven heur gebainte onder n terebint in Jabes; dou vastten zai zeuven doag.
13 Saul kwam aan zien èn, omdat hai ontraauw worden was aan de HEER, omdat hai nait lusterd haar noar t woord van de HEER en omdat hai bie n wikwief om road west haar,
14 in stee van bie de HEER. Doarom haar de HEER hom doodmoakt. t Keunenkschop wer deur de HEER overdroagen op David, zeun van Isaï.
|